ಹೂವಿನ ಹಿಪ್ಪರಗಿ : ದೇವರ ಹಿಪ್ಪರಗಿ ವಿಧಾನಸಭಾ ಕ್ಷೇತ್ರದ ವ್ಯಾಪ್ತಿಗೆ ಬರುವ ರಾಮನಹಟ್ಟಿ ಗ್ರಾಮದಲ್ಲಿ ಆರಾಧ್ಯ ದೈವ ಶ್ರೀ ಲಕ್ಕಮ್ಮ ದೇವಿಯ ಜಾತ್ರಾ ಮಹೋತ್ಸವವು ಅತ್ಯಂತ ಸಡಗರ ಮತ್ತು ಸಂಭ್ರಮದಿಂದ ನೆರವೇರಿತು. ಭಕ್ತಿ ಮತ್ತು ಸಂಬಂಧಗಳ ಬೆಸುಗೆಯಂತಿರುವ ಈ ಜಾತ್ರೆಯಲ್ಲಿ ಸಾವಿರಾರು ಭಕ್ತರು ಪಾಲ್ಗೊಂಡು ದೇವಿಯ ಕೃಪೆಗೆ ಪಾತ್ರರಾದರು.
ಬಿಜೆಪಿ ಮುಖಂಡರ ಭೇಟಿ:
ಜಾತ್ರಾ ಮಹೋತ್ಸವದ ಅಂಗವಾಗಿ ದೇವರ ಹಿಪ್ಪರಗಿ ಕ್ಷೇತ್ರದ ಬಿಜೆಪಿ ಮುಖಂಡರಾದ ಶ್ರೀ ಬಸನಗೌಡ ಎಸ್. ಪಾಟೀಲ (ಯಡಿಯಾಪುರ) ಅವರು ಗ್ರಾಮಕ್ಕೆ ಭೇಟಿ ನೀಡಿ, ದೇವಿಯ ದರ್ಶನ ಪಡೆದರು. ಈ ಸಂದರ್ಭದಲ್ಲಿ ಅವರು ದೇವಸ್ಥಾನದ ಕೃತು ಗದ್ದುಗಿಗೆ ವಿಶೇಷ ನಮಸ್ಕಾರ ಸಲ್ಲಿಸಿ, ಭಕ್ತಿಯಿಂದ ಗೌರವ ಸಮರ್ಪಣೆ ಸ್ವೀಕರಿಸಿದರು.
ಜ್ಞಾನದ ಭಂಡಾರ ರಾಮನಹಟ್ಟಿ:
ಜಾತ್ರೆಯ ಕುರಿತು ಮಾತನಾಡಿದ ಮುಖಂಡರು, “ಶ್ರೀ ಲಕ್ಕಮ್ಮ ದೇವಿ ಜಾತ್ರೆಯು ಕೇವಲ ಒಂದು ಧಾರ್ಮಿಕ ಆಚರಣೆಯಲ್ಲ, ಇದು ಈ ಭಾಗದ ಜನರ ಭಕ್ತಿ ಮತ್ತು ಪರಸ್ಪರ ಸಂಬಂಧಗಳನ್ನು ಗಟ್ಟಿಗೊಳಿಸುವ ಸಾಂಸ್ಕೃತಿಕ ಹಬ್ಬವಾಗಿದೆ. ಅದರಲ್ಲೂ ಈ ವರ್ಷ ರಾಮನಹಟ್ಟಿ ಗ್ರಾಮದಲ್ಲಿ ಜ್ಞಾನದ ಭಂಡಾರವೇ ತೆರೆದುಕೊಂಡಿರುವುದು ವಿಶೇಷ,” ಎಂದು ಶ್ಲಾಘಿಸಿದರು.
ಗ್ರಾಮದ ಹಿರಿಯರು, ಅರ್ಚಕರು ಹಾಗೂ ಜಾತ್ರಾ ಸಮಿತಿಯ ಸದಸ್ಯರು ಮುಖಂಡರನ್ನು ಗೌರವಿಸಿದರು. ಜಾತ್ರೆಯ ಪ್ರಯುಕ್ತ ವಿವಿಧ ಸಾಂಸ್ಕೃತಿಕ ಕಾರ್ಯಕ್ರಮಗಳು ಹಾಗೂ ಧಾರ್ಮಿಕ ವಿಧಿವಿಧಾನಗಳು ಗ್ರಾಮದ ತುಂಬೆಲ್ಲ ಹಬ್ಬದ ಕಳೆಯನ್ನು ಹೆಚ್ಚಿಸಿದ್ದವು
ವರದಿ :: ರವಿಂದ್ರ ನಾಯ್ಕೋಡಿ
